ઘણીવાર એક વખત સફળતાનો…….

ઘણીવાર એક વખત સફળતાનો સ્વાદ ચાખ્યા પછી, આપણને સફળતાની ફોર્મ્યુલા મળી ગઇ છે, એવું આપણને લાગવા મંડે છે.

એકવાર કર્યું એ વારંવાર કરતાં જઇશું, તો સફળતા આપણા કદમ ચૂમશે જ, એવો આત્મવિશ્વાસ આપણી અંદર ઘર કરી જાય છે. આપણે ભ્રમમાં રહીએ છીએ.

ભ્રમ એ રહેવા માટે સારી જગ્યા નથી અને એથી ઘણા કિસ્સાઓમાં આ અતિ-વિશ્વાસ પોકળ સાબિત થાય છે, અને આપણી નિષ્ફળતાનો પાયો બની જતો હોય છે.

આપણે જે રસ્તાઓ પર ગાડીઓ અનેકવાર ચલાવી હોય, એ રસ્તો જ બંધ થઇ જાય, કે એની દિશા ફંટાઇ જાય, ત્યારે આપણું ધ્યાન ન હોય તો આપણે મંઝિલ સાથેનો સંપર્ક ખોઇ બેસીએ છીએ.

આપણી આજની સફળતા આપણી ભાવિ નિષ્ફળતાનું કારણ ન બને એ માટે આંખ-કાન-મન ખુલ્લાં અને સ્વભાવમાં વિનમ્રતા જરૂરી છે.